Fjöruarfi (Honckenya peploides)
Lýsing
Fjöruarfi er af hjartagrasaætt. Hann er lágvaxinn, 15–20 cm, með þykkum, hárlausum, kjötkenndum og safaríkum, fagurgrænum eða gulgrænum laufblöðum. Blómin eru lítilfjörleg, hvít og fimmdeild. Blómgast í júní.
Bæði blöðin og vaxtarstaðurinn eru einstök fyrir fjöruarfa.
Útbreiðsla
Fjöruarfi vex í fjörusandi allt í kringum landið, hann myndar kringlóttar breiður eða brúska, sem geta orðið allstórar. Fáar plöntur hafa jafnmikla útbreiðslu í sandfjörum Suðurlands og hann.
Nytjar
Fjöruarfi var soðinn í mjólk til að drýgja hana og þótti hollur. Hann er jafnframt góð beitarplanta fyrir sauðfé. Mest var hann nýttur í Meðallandi.