Mosar (Bryophyta, fylking)
Plöntur þessar afla næringu eins og aðrar landplöntur með ljóstillífun og sækja næringarefni úr eða af undirlaginu sem þeir vaxa á. Mosar hafa einföld laufblöð sem oft eru einungis eitt frumulag að þykkt og þau eru á mjóum stöngli sem getur verið með greinum eða án. Fæstir mosar hafa æðastreng og það takmarkar stærð þeirra þar sem flutningur á næringarefnum verður hægur þegar ekkert flutningskerfi er til staðar. Mosar eru því smávaxnar plöntur og hæðin er yfirleitt 0,2−10 cm. Þrátt fyrir smæð sína eru mosar víða mjög áberandi. Á Íslandi eru aðstæður þannig að mosar þekja víðfeðm svæði, sem er líklega einstakt á heimsvísu, hér er það aðallega mosinn hraungambri. Í fjörunni eru mosar hins vegar ekki áberandi. Nokkrar tegundir vaxa þar, en það er frekar að þeir verði áberandi ofan við fjörukambinn og þar vaxa þó nokkrar tegundir.
Mosar vaxa víða um veröld í fjölbreyttum búsvæðum nema í sjó þar þrífast þeir ekki. Alls eru þekktar um 12.000 tegundir, það er reyndar ekki alveg á hreinu, þannig hefur verið áætlað að tegundir eru á bilinu 9.500 ̵− 14.500. ÁÍslandi eru þær um 600 og þar af 460 tegundir blaðmosa (baukmosa).
