Sæbjúgu (Holothuroidea, flokkur)
Dýrin eru aflöng og lík bjúgum í laginu eins og nafnið gefur til kynna. Þau eru með fimmskiptingu eins og einkennir önnur dýr sem tilheyra skrápdýrum. Munnur og endaþarmsop eru á sitthvorum enda dýrsins. Eftir endilöngu dýrinu liggja fimm raðir sogfóta, 10 – 30 greinóttir angar umlykja munninn og tengjast angar þessir sjóæðakerfi dýrsins. Angar þessir sjást þegar dýrið er við fæðuöflun en ekki þegar það verður fyrir styggð eða þegar þau reka dauð upp í fjöru. Þau anda með pari af greinóttum öndunarfærum sem greinast út frá þarfagangi rétt innan við endaþarmsopið. Úrgangur er einnig losaður út um þessi líffæri.
Sæbjúgu fara hægt yfir og lifa venjulega grafin í sjávarset, undir grjóti eða í glufum. Sæbjúgu eru svif- eða grotætur.
Núlifandi tegundir sæbjúgna eru ekki mjög margar en nú eru þekktar um 1700 tegundir víðsvegar í höfum Jarðar. Þau eru algeng á sjávarbotni á grunnsævi en þau lifa einnig á ýmsu dýpi allt niður á djúpsjávarbotn.
Brimbútur (Cucumaria frondosa)
Myndin sýnir brimbút rekinn á fjöru. Hann er 15-40 cm að lengd og frá fjöruborði niður á meira en 200 m dýpi. Hann er algengastur á hörðum botni á grunnsævi en finnst einnig á sand- og leirbotni. Brimbúturinn er norrænt dýr, hann lifir frá Norður-Íshafi suður á móts við Skotland austan megin Atlantshafsins en suður til Nýja Englands vestan megin. Veiðar á brimbút hófust 2003 og hafa staðið síðan. Sæbjúgnaeldi er jafnframt stundað í kerjum á landi.